Piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut

 

pillugu

 

Inatsisartut Attaveqarnermut Pilersuinermullu aamma

Ineqarnermut Ataatsimiititaliaata

 

ISUMALIUTISSIISSUTAA

 

siunnersuutip aappassaaneerneqarnerani saqqummiunneqartoq

 

Inatsisartut Attaveqarnermut Pilersuinermullu aamma Ineqarnermut Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Lars Sørensen, IA, siulittaasoq
Inatsisartuni ilaasortaq Per Rosing-Petersen, Siumut
Inatsisartuni ilaasortaq Peter Grønvold Samuelsen, sinniisussaq, Siumut
Inatsisartuni ilaasortaq Godmand Rasmussen, Atassut
Inatsisartuni ilaasortaq Mogens Kleist, Kattusseqatigiit

Inatsisartut Attaveqarnermut Pilersuinermullu aamma Ineqarnermut Ataatsimiititaliaata UKA 2001-imi siullermeerinerup kingorna siunnersuut nassuiaatitai ilanngullugit misissuataarpaa.

 

Siunnersuutip imarisai

Siunnersuut periarfissiivoq piginneqatigiilluni inissiat 105 m² -init anginerusut sananissaannut, Inatsisartuni ilaasortap Mikael Petersenip 2001-imi Inatsisartut upernaakkut ataatsimiinneranni siunnersuutaata oqaluuserineqarnerata kinguneratut, taarsigassarsisinnaanermut.

Taamaaliornikkut piginneqatigiilluni inissiat 105 m² -init anginerusut sananissaannut periarfissiisoqassaaq.Taamaalilluni ineqarfiup angissusianut anginerpaamik 105 m²-imut, piginneqatigiilluni inissiaq anginerugaluarpalluunniit, anginerpaamillu sananeqarneranut aningaasartuut m²-imut kr. 15.000-inik katillugu aningaasartuutitalimmik, taarsigassarsisoqarsinnaassaaq. Piginneqatigiilluni inissiaatileqatigiittut peqatigiiffik kissaateqarpat inissianik anginerusunik akisunerusunilluunniit sananissamik, qaangiineq akisunerussut peqatigiiffiup nammineerluni aningaasaliiffigissavaa.

Ataatsimiititaliap malugaa sananermi aningaasartuutip m²-imut akia kr. 15.000-inik anginerpaamik killilerneqarnissaanik ilanngussineq 2001-imi Inatsisartut upernaakkut ataatsimiinneranni aalajangikkamut naapertuuttuusoq. Taamatut killiliineq ataatsimiititaliap isumatusaarnertut isigaa.

Ataatsimiititaliap isumaqatigiittup inassutigaa Piginneqatigiilluni inissiat pillugit Inatsisartut peq-qussutaata allanngortinneqarneranik Inatsisartut peqqussutissaattut siunnersuut akuersissutigineqassasoq.

Taama oqaaseqarluni Inatsisartut Attaveqarnermut Pilersuinermullu aamma Ineqarnermut Ataatsimiititaliaata siunnersuut aappassaaniigassanngortippaa.

 

	Lars Sørensen, Formand
Per Rosing-Petersen		Godman Rasmussen
Peter Grønvold Samuelsen sinniisussaqt		Mogens Kleist